Shënimi i Peles bën që Santos të mos tërheqë nga fanella numrin 10

Edson Arantes do Nascimento, i njohur botërisht si Pelé, ndërroi jetë të enjten e kaluar në moshën 82-vjeçare, për shkak të kancerit të zorrës së trashë. Ish-futbollisti konsiderohet si një nga më të mirët, nëse jo më i miri, i të gjitha kohërave dhe Santos, klubi i dashurisë së tij, kishte menduar të bënte një homazh të veçantë duke tërhequr fanellën me numrin 10.

Në stilin e NBA, ku skuadrat tërheqin numrin e lojtarëve më të dalluar, Santos po mendonte të merrte të njëjtin vendim pas vdekjes së Pelé. Siç deklaroi dhe presidenti i Santos, Andrés Rueda, në fillim u mendua të tërhiqej numri 10, por në fund kjo nuk do të ndodhë.

Fillimisht, Santos nuk do të përdorte ’10’ gjatë muajit janar, ndërsa më pas u diskutua kërkesa për tërheqjen e përhershme të numrit. Megjithatë, në orët e fundit u zbulua një shënim nga Pele i vitit 2017, ku ai thoshte se nuk do ta pëlqente fare idenë e tërheqjes së numrit nga fanella. Në nder të tij një gjë e tillë nuk do të ndodhë.