Sherri me një viktimë në Gramsh, reagon ministrja Kushi

Ministrja e Arsimit Evis Kushi ka reaguar përmes një postimi në Facebook sa i takon sherrit me thika mes adoleshentësh në Gramsh, ku humbi jetën një 15-vjeçar dhe u plagos një tjetër.

Ajo u shpreh se ishte e tronditur nga ngjarja dhe theksoi rëndësinë e forcimit të bashkëpunimit mes institucioneve arsimore dhe atyre ligjzbatuese.

Deklarata e plotë:

Jam thellësisht e tronditur nga ngjarja e ndodhur sot në Gramsh, ku një adoleshent ka humbur jetën si pasojë e një konflikti me bashkëmoshatarët e tij.

Pavarësisht se kjo ngjarje ka ndodhur në rrugë, jashtë mjediseve të shkollës, institucionet tona arsimore, së bashku me institucionet e tjera ligjzbatuese, prindërit dhe familjet, duhet të forcojmë më shumë bashkëpunimin për të luftuar fenomenet negative tek fëmijët dhe të rinjtë, të cilat çojnë në ngjarje të tilla të rënda.

Një nga prioritetet në sistemin tonë arsimor është forcimi i sigurisë në shkolla, për të cilën punojmë fort duke rritur nga viti në vit numrin e punonjësve të shërbimit psiko-social dhe oficerëve të sigurisë, si dhe duke i trajnuar ata dhe mësuesit në mënyrë të vazhdueshme. Megjithatë, ne duhet të reflektojmë të gjithë si shoqëri që të rrisim vigjilencën për të parandaluar, identifikuar dhe menaxhuar raste të konfliktit në shkollë, familje dhe kudo tjetër.

Shpreh ngushëllimet më të ndjera për familjen e adoleshentit, duke shpresuar që të mos kemi kurrë më ngjarje të tilla.

LEXONI GJITHASHTU:

• Evis Kushi voton në Elbasan: Kjo do jetë dita më e bukur
• Finalizohet Konkursi i Gjuhës Shqipe, Kushi: Ruajtja dhe forcimi i shqipes, detyrë