Shiste produkte të skaduara pranë shkollës, procedohet pronarja e dyqanit

Pronarja e një dyqani në kryeqytet është proceduar penalisht, pasi tregtonte produkte të skaduara në afërsi të një shkolle.

Policia bën me dije se gjatë kontrolleve, në rrugën “Tre Dëshmorët”, u konstatua se në dyqanin e shtetases F. Ç., 60 vjeçe, u gjetën dhe u sekuestruan produkte të ndryshme ushqimore që ajo i shiste edhe pse i kishte kaluar afati i konsumimit.

Materialet në ngarkim të saj u referuan në Prokurorinë pranë Gjykatës së Shkallës së Parë të Juridiksionit të Përgjithshëm, në Tiranë.

“Shërbimet e Komisariatit të Policisë Nr. 6 dhe shërbimet e Seksionit për Hetimin e Krimeve Ekonomike dhe Financiare, në vijim të punës për garantimin e rendit dhe sigurisë, evidentimin me përgjegjësi të çdo veprimtarie apo fenomeni, që cenon sigurinë e nxënësve, kanë vijuar intensifikisht kontrollet, në bashkëpunim me inspektorët e Autoritetit Kombëtar të Ushqimit, në afërsi të shkollave të ndryshme të Tiranës, ku tregtohen produkte ushqimore për nxënësit.

Gjatë kontrolleve, në rrugën “Tre Dëshmorët”, në dyqanin e shtetases F. Ç., 60 vjeçe, u gjetën dhe u sekuestruan produkte të ndryshme ushqimore që ajo i shiste në afërsi të një shkolle, edhe pse iu kishte kaluar afati i konsumimit”, thuhet në njoftimin e policisë.

LEXONI GJITHASHTU:

• Shiste mallra të skaduara afër shkollës, arrestohet shefi i Policisë Bashkiake
• Arrestimi i zyrtarit që shiste produkte të skaduara në shkollë, reagon Balla