Shiste mallra të skaduara afër shkollës, arrestohet shefi i Policisë Bashkiake

Policia e Sarandës ka goditur një rast të shitjes së produkteve ushqimore të skaduara, brenda perimetrit të sigurisë së një shkolle në Konispol.

Nga verifikimet e kryera, në kuadër të kontrolleve për zbatimin e Paketës së Sigurisë në shkolla, ka rezultuar se produktet ishin të kontrabanduara dhe shiteshin pa faturë.

Në pranga ka përfunduar pronari i këtij subjekti, me detyrë përgjegjës i Policisë Bashkiake Konispol, i cili duke përdorur detyrën e tij, ka shmangur kontrollet  në dyqan.

Në cilësinë e provës materiale u sekuestruan produkte të ndryshme ushqimore të kontrabanduara dhe të skaduara, ndërkohë që materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.

“Në vijim të veprimeve, specialistët për Hetimit e Krimeve Ekonomike dhe Financiare të Komisariatit të Policisë Sarandë arrestuan në flagrancë pronarin e dyqanit, shtetasin N. A., 56 vjeç, banues në Konsipol, me detyrë përgjegjës i Policisë Bashkiake Konispol.

Nga verifikimet ka rezultuar se ky shtetas duke përdorur detyrën, ka ndikuar për të shmangur kontrollet në subjektin ku shiteshin produkte pa faturë”, thuhet në njoftimin e  policisë.

LEXONI GJITHASHTU:

• Arrestimi i zyrtarit që shiste produkte të skaduara në shkollë, reagon Balla
• U vuri flakën shkurreve dhe disa pemëve frutore, procedohet një person në Elbasan