Shkodër, presidenti Meta përkujton martirët e 2 prillit: Fuqinë e votës ta përdorim për të mbrojtur demokracinë

Presidenti i Republikës Ilir Meta ishte sot në Shkodër në ceremoninë përkujtimore të 30-vjetorit të vrasjes së martirëve të Demokracisë, nga ku bëri thirrje që shqiptarët të mbrojnë me votë demokracinë, sipas tij në rrezik.

Sipas kreut të shtetit, Shkodra dhe gjithë Shqipëria duhet të nisen drejt 25 prillit për të vendosur në vend demokracinë dhe për t’i dhënë fund asaj që e quajti kapja e shtetit, që ka ‘mbajtur peng integrimin e evropian të vendit’.

“Kam bërë çdo gjë për të qenë sot këtu, jo vetëm për të qenë në përvjetorin e martirëve të demokracisë, por sepse vendi sot është në një udhëkryq, nga jam i bindur se do të dalim me sukses falë vullnetit të shqiptarëve.

Do të jem në krye të mbrojtjes së votës së shqiptarëve më 25 prill, kështu do të nderojmë martirët e Shkodrës dhe gjithë martirët e demokracisë.

I bëj të qartë çdo shqiptari se ai është zot i këtij vendi dhe ajo materializohet përmes votës së tij.

Fuqinë e kësaj vote ta përdorim për të mbrojtur demokracinë, për të mos lejuar shpopullimin e vendit”, tha kreu i shtetit.