Shkrimtarja flet për dokumentin e Enver Hoxhës: Lërini të thonë vetë se do t’i shembim kishat dhe xhamitë

E ftuar në emisionin “Now me Erla Mëhillin”, shkrimtarja Rita Petro foli në lidhje me Krishtlindjet dhe mënyrën se si festoheshin ato në kohën e komunizmit, kur në Shqipëri feja ishte e ndaluar.

Ndër të tjera, ajo tregoi për një dokument që kishte lexuar, ku Enver Hoxha jepte direktiva për mënyrat e largimit të njerëzve nga feja.

“Kam lexuar një dokument që ishte i Enver Hoxhës, që thoshte: ne nuk ua heqim dot nga koka fenë njerëzve, por lerini ata dhe nxitini që të thonë ‘ne do t’i shembim kishat dhe xhamitë, sepse feja është opium’. Ishte nxitja që komunistët t’i shtynin njerëzit që ata vetë të spiunonin dhe të shikonin se kush do t’i ndiqte këto rite. Ishte shumë e thellë, ajo dinakëria”, tha ajo.

Gjithashtu, Petro tregoi me emocion se si nëna e saj bënte ëmbëlsira dhe i shpërndante me frikën se mos kuptohej.

“Mami bënte ëmbëlsira për Krishtlindje apo për Pashkë dhe i shpërndante, duke thënë: mos na thonë gjë, unë po i shpërndaj për Vitin e Ri”, tha shkrimtarja.