Shmanget sulmi terrorist në Belgjikë, arrestohen 8 anëtarë të një celule xhihadiste

Policia në Belgjikë ka arrestuar 8 persona të dyshuar se ishin gati të kryenin një sulm terrorist në vend.

Lajmin e ka bërë të ditur zyra e prokurorit federal, sipas të cilës kontrolle të shumta janë kryer në Bruksel, Anversë dhe në qytetin kufitar Eupen.

Sipas burimeve zyrtare, të arrestuarit ishin persona të radikaliuar që në moshë të vogël dhe dyshohet se i përkisnin një lëvizjeje xhihadiste.

Në detaj janë tre të arrestuarit në kuadër të një hetimi të prokurorisë në Bruksel dhe 5 të tjerë në kuadër të një hetimi analog në Anversa.

“Mes dy rasteve ka lidhje, por hetime të mëtejshme do të tregojnë se deri në çfarë pike të dyja çështjet janë ndërthurur”, ka deklaruar një nga burimet pranë gjyqësorit belg.

Të paktën dy nga personat e përfshirë dyshohen se po përgatisnin një sulm terrorist, por objektivi i atentatit nuk është zbuluar ende.

Ata vazhdojnë të jenë të ndaluar për t’u marrë në pyetje dhe vetëm më pas prokurori do të vendosë nëse do të konfirmojë arrestimin.

LEXONI GJITHASHTU:

• Lirimi i Bajrit, mediat belge: Gangsteri më i kërkuar në Belgjikë, i dënuar 22 vite
• Akuzohet për trafik kokaine, Ramazan Rraja dënohet me 12 vjet burg në Belgjikë