“Shot / Reverse Shot” – GOCAT sjell ekspozitën që sheh drejt në sy

Ka ngjarje që nuk tregohen me fjalë. Ka kohë që nuk kthehen më, por që mbeten të skalitura në kujtesë dhe ndonjëherë, në fotografi.

Mbrëmjen e djeshme, në Galerinë e Artit Bashkëkohor GOCAT, u hap ekspozita “Shot / Reverse Shot”,  një takim përtej kohës mes dy brezash, dy sysh, dy mënyrash të të parit e të të kuptuarit të Shqipërisë.

Në qendër qëndrojnë fotografitë unike të Barry Lewis, të realizuara në Shqipërinë e viteve ’90, në një vend që sapo kishte nisur të merrte frymë ndryshe, në një popull që mbante ende mbi supe peshën e së shkuarës. Këto pamje të rralla, që për dekada jetuan larg nesh, marrin sot përgjigje nga një brez i ri artistësh shqiptarë, që flasin me zërin e së tashmes.

Kuratori Burim Myftiu e përshkroi ekspozitën si një studim antropologjik të shpirtit shqiptar në tranzicion:

“Kjo ekspozite eshte nje studim antropologjik i  viteve 90- 91. Keto nuk jane vetem fotografi, keto jane njevepra te thella dhe ky i shtegetoi neper bote, I ktheu tani ne shqiperi dhe gjeneratat qe jane lindur pas viteve 90 e kane nje retrospektive, nje pamje te prinderve te tyre te cilet I kane degjuar, port ani mund ti shohin dhe vizualisht”, thotë Burim Myftiu, kurator i ekspozitës.

Fotografi britanik Barry Lewis, i pranishëm në hapje pas më shumë se tri dekadash, u shpreh I befasuar nga ndryshimi që gjeti.

“Ishte si të rikthehesha në një vend tjetër. Kaq shumë ndryshim… kaq shumë jetë. M’u duk sikur kishte më shumë turistë se vendas në rrugët e Tiranës”, thotë fotografi Barry Lewis.

Ekspozita është një bisedë vizuale e ndjeshme dhe bashkëkohore, ku çdo vepër është një pikë ndalimi, një pasqyrë dhe një pyetje për identitetin.

Në këtë bisedë, pjesë e pazëvendësueshme është edhe Roland Tasho, ndër të vetmit fotografë shqiptarë që kanë dokumentuar ato vite.

“Une duke qene edhe bashkekohes I fotografit dhe do te thoja qe per mendimin tim, pa njohur te kaluaren sic duhet nuk mund te shohesh te ardhmen . Eshte nje pune e jashtezakonshme e kuratoreve qe e sollen autorin ketu dhe njekohesisht qe me bene edhe mua pjese te ketij pazelli”, thotë fotografi Roland Tasho.

“Shot / Reverse Shot” është një ftesë për të parë më thellë në të kaluarën, tek njëri-tjetri dhe brenda vetes.

Nën kujdesin e Fondacionit MANE ekspozitado të qëndrojë e hapur falas për publikun deri më 7 shtator.