Shpërthim tragjik në një fabrikë mbeturinash në Itali, humbin jetën tre persona

Një ngjarje e rëndë është regjistruar këtë të enjte në Marcianise, një qytet në provincën e Caserta-s, në jug të Italisë. Tre persona kanë humbur jetën si pasojë e një shpërthimi të fuqishëm që ka ndodhur në ambientet e një fabrike për përpunimin e mbetjeve, me emrin “Ecopartenope”.

Sipas mediave italiane, mes viktimave janë tre punëtorë të fabrikës, përfshirë edhe pronarin e kompanisë. Ata ndodheshin pranë një depoje në momentin kur ndodhi shpërthimi fatal.

Një person tjetër rezulton ende i zhdukur, ndërsa dy të tjerë kanë mbetur të plagosur lehtë.

Shpërthimi, sipas burimeve paraprake, dyshohet të jetë shkaktuar nga një rezervuar me vaj të përdorur, i cili ka shpërthyer duke shkaktuar një valë goditjeje të fuqishme që u ndje në të gjithë zonën përreth. Dëshmitarë okularë thonë se fuqia e shpërthimit ka qenë aq e madhe, saqë trupat e punëtorëve janë hedhur disa metra në ajër.

Në vendngjarje ndodhen ekipe të shumta zjarrfikësish, ndërkohë që autoritetet po vijojnë operacionet për kërkimin e personit të zhdukur dhe hetimin e plotë të rrethanave të kësaj ngjarjeje tragjike.

Ngjarja ka tronditur komunitetin lokal dhe ka rikthyer vëmendjen tek standardet e sigurisë në vendet e punës në sektorin e përpunimit të mbetjeve.

LEXONI GJITHASHTU:

• Italianët nuk zgjodhën sërish Shqipërinë për pushime, rënie e ndjeshme në shifra
• Shpërndanin kokainë për turistët e huaj, arrestohen tre të rinjtë shqiptarë në Itali