Shpërthime dhe tym mbi Rripin e Gazas, Euronews pasqyron ofensivën e Izraelit

Ekipi i Euronews Albania, ka pasqyruar të rejat më të fundit nga fronti i luftës në Izrael.

Gazetari Thimi Samarxhiu dhe operatori Olti Allmeta, të vendosur në qytetin e Ashkelon, shumë pranë Rripit të Gazas, paqyruan pamjet live të ofensivës në Gaza.

Nga pamjet e siguruara shihen qartë shtullungat e tymit mbi Rripin e Gazas, ku pak më herët sipas gazetarit Samarxhiu u dëgjuan dhe shpërthime të fuqishme.

Sulme me raketa ka pasur dhe mbi qytetin e Ashkelon, të cilat u interceptuan nga sistemi antiraketor i Izraelit “Iron Dome”.

“Jemi në Ashkelon siç mund të shihni dhe nga pamjet pas krahëve të mi ka tym në territorin e Rripit të Gazës. Pak më parë ka pasur disa shpërthime të fuqishme, ka patur shtullunga të mëdha tymi në këtë drejtim. Ka pasur dhe shpërthime dhe zjarr dhe në territore brenda Izraelit. Pak orë më parë këtu në Ashkelon ka pasur raketa të cilat janë interceptuar nga sistemi “Iron Dome” i Izraelit, ka pasur disa të tilla që kanë shpërthyer disa metra larg nesh. Por “Iron Dome” është efikas dhe ka bërë t’i mundur t’i parandalojë. Hamasi po vijon sulmet, ndërkohë që Izraeli ofensivën”, tha ai.

Gjithashtu gazetari Samarxhiu bëri me dije sulme ka pasur dhe në veri të Izraelit nga grupi i Hezbollah. Ai shtoi se brenda territorit izraelit është  kapur një celulë terroriste që po organizohej të sulmonte.

“Pak minuta më parë ëshë bllokuar një celulë terroriste e cila kishte hyrë brenda territorit të Izraelit dhe po përgatiste sulme brenda territorit të Izraelit”, tha Samarxhi.

LEXONI GJITHASHTU: 

• Pamje Ekskluzive nga Euronews Albania. Raketat mbi qytetin Ashkalon në Izrael
• Sirena alarmi e raketa në qiell, Euronews Albania kap momentet dramatike nga lufta