Lëvizja ‘Shqipëria bëhet’ depozitoi këtë të premte në Kuvendin e Shqipërisë projektligjin për ndërhyrjen në Kodin Zgjedhor dhe Kushtetutë në pikat që kanë të bëjnë me zgjedhjet dhe sistemin elektoral.

Projektligji u adresohet 140 deputetëve të Republikës së Shqipërisë, me propozimin për ndryshimin e sistemit zgjedhor në sistem proporcional kombëtar me lista të hapura, thuhet në një njoftim për shtyp të kësaj lëvizjeje.

E drejta e votës, konkretisht e drejta për të zgjedhur, është një nga të drejtat themelore politike që gëzon individi dhe ajo duhet të ketë të njëjtën peshë në të gjithë Republikën e Shqipërisë.

Avokati Ervis Çela tha se në rast se ky propozim nuk do të merret parasysh, do të procedohet me mbledhjen e 20.000 firmave për ta sjellë si iniciativë qytetare.

Lëvizja “Shqipëria Bëhet” ka kërkuar më herët edhe votën e emigrantëve, por për këtë çështje ditën e djeshme kryeministri Rama u shpreh se mungesa e një data baze të emigrantëve shqiptarë në botë, e pengon votën e diasporës.