Shqipëria importoi 8,100 tonë kafe, çmimi u rrit 5% për shkak të kërkesës së lartë

Çmimi i kafesë u rrit ndjeshëm vitin e kaluar për shkak të rendimentit të ulët në vendet e origjinës. Ndërkohë, në çmim ka ndikuar edhe kërkesa e lartë nga shtimi i numrit të turistëve.

Vitin e kaluar, çmimi mesatar i kafesë u rrit me 5%, ritmi më i lartë që nga viti 2022, ndërsa arsyet gjenden tek furnizimi në tregjet ndërkombëtare dhe rritja e konsumit nga turistët në vendin tonë.

Të dhënat nga doganat tregojnë se importet e kafesë vitin e kaluar arritën rekord 8,100 tonë, me një rritje prej 5% krahasuar me vitin 2024.

Prodhuesit e mëdhenj, Brazili dhe Vietnami, janë goditur nga moti ekstrem, i cili ka dëmtuar rendimentin, dhe rënia e prodhimit global ka ndikuar gjithashtu në çmim.

Në të njëjtën kohë, kërkesa globale ka vazhduar të rritet, sidomos në Azi dhe në tregjet urbane të vendeve në zhvillim, ku konsumi i kafesë po rritet me ritme më të shpejta se në Europë dhe Amerikën e Veriut.

Në lokalet e Tiranës, një filxhan kafe blihet sot nga 80 deri në 120 lekë, dhe luhatjet e çmimit ndikojnë në strukturën e bizneseve të vogla, të cilat janë masivisht të lidhura me këtë produkt. Në shumë prej tyre, kafeja përbën pjesën më të madhe të xhiros dhe të fitimit.