Shqipëria përmirëson qëndrueshmërinë fiskale, borxhi publik bie me ritme të qëndrueshme

Borxhi publik i Shqipërisë ka shënuar një ulje të konsiderueshme gjatë dekadës së fundit, duke reflektuar përmirësim të qëndrueshmërisë fiskale dhe menaxhim më efikas të financave publike.

Sipas të dhënave të publikuara nga Ministria e Financave, raporti borxh/Prodhim i Brendshëm Bruto ka rënë nga 70% në vitin 2014 në 53% në vitin 2025. Kjo ulje tregon se ekonomia po rritet me ritme më të shpejta se borxhi, ndërsa kostot e financimit kanë pësuar rënie.

Financimi me norma më të ulëta interesi ka kontribuar në optimizimin e shpenzimeve për shërbimin e borxhit, ndërsa struktura e portofolit paraqitet më e balancuar. Borxhi i brendshëm përbën 59,4% të totalit, ndërsa ai i jashtëm 40,6%. Pesha e borxhit në valutë të huaj ka rënë në rreth 40%, nga 42% më parë, duke reduktuar ekspozimin ndaj rrezikut valutor.

Një tregues tjetër i rëndësishëm është zgjatja e maturimit mesatar të borxhit të brendshëm, i cili ka arritur në 2,8 vite në vitin 2025, nga 1,7 vite në 2014 dhe 2,6 vite në 2024. Rritja e jetëgjatësisë mesatare përmirëson profilin e rrezikut të rifinancimit dhe forcon qëndrueshmërinë e financave publike.