Kombëtarja shqiptare vijon përgatitjet në prag të duelit të parafundit kualifikues drejt kampionatit evropian, atë ndaj Zvicrës. Trajneri Alban Bushi ka publikuar dhe listën me lojtarët e thirrur, ku në total janë 23 futbollistë, 10 prej tyre nga kampionati vendës. Pavarësisht thirrjes së tyre, tekniku kuqezi kërkon më tepër punë nga ana e skuadrave.
“Nga kampionati shqiptar nuk jam shumë i kënaqur, nuk janë aktivizuar shumë të rinj, potenciali ka qenë nga jashtë. Këtë sezon ka filluar të ketë aktivizime, si Vllaznia me Dodën, me prespektivë. Kemi të rinj, kampionati ynë ka filluar, por duhet edhe më tepër, sidomos pasi janë edhe pa kosto”, tha Alban Bushi, trajner i Shqipërisë U-21.
Dueli ndaj helvetëve do të jetë i vështirë, por kuqezinjtë mendojnë se mund të marrin rezultat pozitiv në transfertë.
“Zvicra është e fortë, nivel i lartë e potencial. Kemi pamje të qartë, ata në mundën në Air Albania, kishin më tepër zotërim, por ne ishim më mirë. Patëm disa raste. Kur sheh rezultatin 3-1 nuk tregon se ata ishin aq favoritë. I kemi të gjitha shanset, skemi presion, matematikisht brenda objektivave. Mendoj që kemi shanse ta mundim Zvicrën atje, ata kanë presion për vendin e parë”, tha Alban Bushi, trajner i Shqipërisë U-21.
Zvicër-Shqipëri luhet më 6 shtator, ndërsa ndeshja e parë mes tyre u mbyll në shifrat 1-3 në favor të zviceranëve. Në grupin ku kuqezinjtë bëjnë pjesë renditen në vendin e 4 me 10 pikë në 8 ndeshje.
LEXONI GJITHASHTU:
- Tensionet në Lindjen e Mesme| Agjencia e OKB në Palestinë: Kemi humbur 212 kolegë
- Kartolina e dërguar 121 vjet më parë mbërrin në adresën në Uells
