Shteti mblodhi 6 mld euro, të ardhurat u rritën 12% në 2023-shin

Arka e shtetit mblodhi 6 mld euro gjatë vitit 2023, ose 680 mln euro më shumë se viti 2022. Pjesa më e madhe e parave u mblodh nga sigurimet dhe tatimi mbi pagat.

Buxheti i shtetit ka mbledhur në vitin 2023, 643 miliardë lekë, ose rreth 6 miliardë euro. Të dhënat e përcjella nga Ministria e Financave tregojnë se qeveria dhe bashkitë mblodhën 680 mln euro më shumë se viti 2022, rritje kjo që mbërrin në 12.3%

Individët janë ata që kanë dhënë ndikimin kryesor në rritjen e të ardhurave në buxhet, përmes pagesave të sigurimeve dhe të tatimit mbi të ardhurat personale. Nga këto dy zëra u mblodhën rreth 330 mln euro, ose gati gjysma e rritjes së të ardhurave.

Ndërkohë, në zërat e tjerë, të ardhurat nga tatim-fitimi i bizneseve u rritën me165 mln euro; nga tatimi mbi pagat me 125 mln euro më shumë; nga sigurimet shoqërore dhe shëndetësore me 200 mln dhe nga TVSH 105 mln euro.

Të ardhurat tatimore dhe kontributet, për 12-mujorin e vitit 2023, u realizuan në masën 99.7% me planin e rishikuar në rritje me aktin normativ të buxhetit, si edhe në masën 101% me planin fillestar.

Shpenzimet e përgjithshme publike për vitin 2023, arritën në rreth 6.5 miliardë euro me një realizim në masën 96.6 përqind të planit. Krahasuar me vitin 2022 shpenzimet e përgjithshme publike rezultojnë 3.6 përqind më të larta ose 233 mln euro lekë më shumë.

Niveli i deficitit për vitin 2023 rezultoi në masën 1.4% të PBB-së, krahasuar me 3.7% të PBB-së që ishte në vitin 2022.

LEXONI GJITHASHTU:

• Vit i mbarë për energjinë elektrike, HEC-et prodhuan 8.8 mln megavat
• Nis asfaltimi në lotin e parë Elbasan-Qafë Thanë, Balluku: Gati brenda pak javësh