Shtyhet gjyqi për “Gërdecin”, SPAK kërkon dëshmitar Shkëlzen Berishën

Gjyqi për Fatmir Mediun lidhur me çështjen Gërdeci është shtyrë përsëri. Seanca e radhës do të mbahet më 29 shtator.

Vendimi erdhi pas kërkesës së SPAK për 52 dëshmitarë, mes tyre Aldo Bumçin dhe Shkëlzen Berishën.

Mbrojta e Mediut kërkoi kohë që të njihet me kërkesën e SPAK për dëshmitarët dhe provat, që të mos ketë përplasje mes tyre.

Në seancën e radhës në 29 shtator, në 14:30 do të shprehet gjykata se cilët janë personat që do të pranohen si dëshmitarë.

Çështja ndaj ish-ministrit Mediu është rihapur pasi Zamira Durdaj, e cila humbi të birin në ngjarjen e Gërdecit, e kallëzoi atë në SPAK.

Fillimisht Shkalla e Parë e Gjykatës së Posaçme e rrëzoi kërkesën e SPAK-ut për ta rigjykuar Mediun, me argumentin se kanë kaluar të gjitha afatet ligjore për rishqyrtimin e çështjes dhe se nuk ka prova të reja.

Gjykata pati arsyetuar se mungesa e imunitetit të Mediut, sidomos pas vitit 2019, nuk e ka penguar prokurorinë të nisë procedurat.

Mediu ishte një nga të akuzuarit për shpërdorim detyre për ngjarjen e vitit 2008 ku Shqipëria u trondit nga shpërthimi i një depoje të armëve ushtarake në Gërdec, në afërsi të Tiranës.

LEXONI GJITHASHTU:

• Mbahet sot seanca gjyqësore për Fatmir Mediun, ish-ministri nuk është i pranishëm
• Nga Majko e Kodheli te zyrtarët e Pentagonit, ja dëshmitarët e thirrur nga Mediu