Shuhet Jean Luc Godard, regjisori që revolucionarizoi kinemanë lë pas 100 filma

Regjisori francez Jean Luc Godard, njeriu që udhëhoqi Valën e Re të kinemasë franceze, ka ndërruar jetë në moshën 91-vjeçare.

Godard debutoi në ekranin e madh në vitet ’60 me filmin “Pa frymë”, që përveç vlerësimeve të shumta shkroi rregullat e kinemasë.

Veprat e tij sollën një hov të ri, e bënë kinemanë më të guximshme dhe influencuan regjisorë të tjerë si Martin Scorsese apo Quentin Tarantino.

Presidenti francez Emmanuel Macron deklaroi se Godard kishte vizionin e një gjeniu. “Fillimisht ai u shfaq si një hije në kinemanë franceze dhe më pas u bë padroni i saj”, u shpreh Macron në mesazhin e tij.

Mes filmave më influentë të Godard në vitet ’60 ishin “Përbuzja” dhe “Banda e të Huajve”.

“Përbuzja”, ku interpreton aktorja e famshme Brigitte Bardot, u konsiderua nga Scorsese si një ndër 10 filmat e tij të preferuar.

“Ai është një nga filmat më prekkës të epokës së tij dhe Godard ishte një artist i kinemasë”, shkroi regjisori i njohur në 2014-n.

Rrëfimet e Godard kombinuan kohën dhe hapësirën, duke ndryshuar idenë e një tregimi fiks. Njëherë ai tha: “Një histori duhet të ketë një fillim, një mes dhe një fund, por jo domosdoshmërish në këtë radhë”.

Në karrierën e tij ai realizoi në total 100 filma, përfshirë ata si “Një grua si Mari”, “I çmenduri Pierrot”, apo “Fundjava”.

LEXONI GJITHASHTU:

• Aktori dhe regjisori i njohur grek shpallet fajtor për dy përdhunime
• Regjisori ukrainas proteston kundër censurës së imazheve të luftës në Ukrainë