Sot qytetet e Shqipërisë festojnë 110-vjetorin e Pavarësisë.
Vlora është kryeqendra e festimeve, ndërsa aktivitete të shumta janë organizuar dhe në Korçë e Shkodër.
Korrespondenti i Euronews Albania në Korçë, Xhensil Shkëmbi raportoi se festimet do të nisin me performancën e bandës së qytetit te “Ushtari i Panjohur”.
Edhe në Pogradec do të ketë aktivitete. Ato do të realizohen në qendrën artistike “Lasgush Poradeci”.
Shkodra feston sot dhe jo nesër. Korrespondenti Teodor Gjerga raportoi se të djathtët festojnë vetëm sot, ndërsa të majtët njohin edhe 29 Nëntorin.
Edhe banerat në rrugë shkruanin “28 Nëntor 1912”. Fillimisht do të organizohen disa aktivitete në sheshin e qytetit dhe më pas do të vijojnë me homazhet.
Durrësi nuk ka bërë asnjë organizim për festën e Pavarësisë. Korrespondentja Kloida Gjuzi u shpreh se aktivitetet e vetme janë organizuar nga strukturat hoteliere. Thuajse të gjitha hotelet janë duke punuar me kapacitete të plota për shkak të turistëve nga Kosova që kanë zgjedhur Durrësin për të kremtuar festat e Nëntorit.
Edhe në Elbasan festimet janë në nivel protokollar. Korrespondenti Renato Tafani u shpreh se ka vetëm disa ceremoni të rastit të parashikuara nga Bashkia.