Situata e motit, reagon Peleshi: Vëmendje e shtuar në qarqet e Lezhës dhe Dibrës

Ministri i Mbrojtjes, Niko Peleshi, ka reaguar në lidhje me situatën motit të keq që ka përfshirë vendin.

Përmes një postimi në facebook, Peleshi shkruan se ekipet e Emergjencave Civile dhe efektivët e Forcave të Armatosura ndodhen në terren për menaxhimin e situatës. Ai shton se me vëmendje të shtuar po ndiqet situata në qarkun e Lezhës dhe Dibrës.

Ministri shton se edhe ekipet e OSHEE ndodhen në terren për eliminimin e defekteve me energjinë.

“Ekipet e Emergjencave Civile dhe efektivët e Forcave të Armatosura vijojnë pa u ndalur angazhimin për menaxhimin e situatës së krijuar nga moti i rënduar, ku fatmirësisht nuk ka zgjerim të hartës së zonave të prekura.

Në qarkun e Gjirokastrës po punohet për kthimin në normalitet të e aksit rrugor që lidh qytetin e Gjirokastrës me fshatrat Karjan, Mingul dhe Gjat i bllokuar për shkak të reshjeve të dendura. Në qarkun e Korçës, po punohet me intensitet për riparimin e urës që u dëmtua në fshatin Panarit.

Me vëmendje maksimale po ndiqet situata në qarkun e Dibrës dhe Lezhës, ku per shkak të reshjeve që vijojnë me intenstet të lartë ka bllokime rrugësh.

Angazhim maksimal për të shmangur çdo rrezik për jetët njerëzore e gjënë e gjallë.

Grupet e punës të OSHEE vijojnë të jenë në terren për eleminimin e defekteve dhe rilidhjen e energjisë në zonat e thella”, shkruan Peleshi në facebook.