S’ka datë për negociatat, vetoja e Bullgarisë për RMV bllokon edhe Shqipërinë

Shqipëria dhe Maqedonia e Veriut nuk kanë arritur sërish të marrin një datë për mbajtjen e Konferencës së Parë Ndërqeveritare për të nisur negociatat me familjen e Bashkimit Evropian.

Shkak u bë vetoja e Bullgarisë për problemet që ka me Maqedoninë e Veriut. Lajmi u bë i ditur nga ministrja e Jashtme e Portugalisë, Ana Paula Zacarias e cila theksoi se u vendos që të shtyhet data për Konferencën e Parë Ndërqeveritare.

“Ne e nisëm ditën me bisedimet për zgjerimin. Fatkeqësisht, pavarësisht të gjitha përpjekjeve tona, ishte e pamundur që të arrijmë një dakordësi për mbajtjen e kornizës së negociatave dhe mbajtjen e Konferencës së Parë Ndërqeveritare për Shqipërinë dhe Maqedoninë e Veriut. Ne shpresojmë se presidenca sllovene do të mund të arrijnë në përcaktimin e datës. Perspektiva evropiane e Ballkanit Perëndimor është një pjesë jetike e Bashkimit Evropian”, tha ajo.

Shqipëria nuk arriti dot të merrte një datë për negociatat me Bashkimin Evropian nën presidencën e Portugalisë dhe tani sytë janë drejtuar tek Sllovenia, e cila pritet të marrë drejtimin e presidencës së Bashkimit Evropian.

Sa i takon Shqipërisë, të gjitha vendet e unionit ishin “pro” mbajtjes së Konferencës së Parë Ndërqeveritare, përfshirë këtu edhe vendet më skeptike siç ishte Holanda, por mosmarrëveshjet e krijuara mes Bullgarisë dhe Maqedonisë së Veriut frenuan qartazi përpjekjet e vendit tonë, që të hapte një kapitull të ri në rrugën e anëtarësimit në Bashkimin Evropian.

Ministrat e Jashtëm të BE-së u mblodhën këtë të martë në Këshillin për Çështjet e Përgjithshme në Luksemburg, por këmbëngulja e Bullgarisë ndaj Maqedonisë së Veriut arriti deri aty sa të bllokonte caktimin e një date konkrete për mbajtjen e Konferencës së Parë Ndërqeveritare.

Bullgaria kërkon që Maqedonia e Veriut të njohë zyrtarisht se gjuha e saj ka rrënjë bullgare, kurse Maqedonia e Veriut nga ana tjetër thotë se Bullgaria po pengon të drejtën e saj për vetëvendosje dhe duke bllokuar bisedimet e anëtarësimit nuk po tregon as “miqësi as vëllazëri”.

LEXONI GJITHASHTU: 

• Bullgaria s’ndryshon qëndrim në lidhje me hapjen e negociatave për Maqedoninë e Veriut
• “Asnjë ndërhyrje në identitetin tonë”, Zaev: Pres ende që Bullgaria të heqë dorë nga vetoja ndaj RMV