Një ngjarje e paprecedentë në kufijtë e një skandali diplomatik ka ndodhur pasditen e së enjtes në aeroportin ndërkombëtar të Shkupit.

Zyra e shtypit e Presidentit të Kosovës, ka bërë me dije Presidentja e Kosovës, Vjosa Osmani, ka pasur konfrontim me sigurimin e aeroportit, të cilët kanë tentuar t’i marrin edhe celularin.

Osmani më pas ka kërkuar ndihmë nga kryetari i parlamentit të Maqedonisë së Veriut, Afrim Gashi, i cili ka dërguar në aeroport personelin e tij të sigurimit. Këshilltari i presidentes Osmani, e ka cilësuar këtë ngjarje si një skandal dhe provokim të rëndë dhe që nuk ndikon në raportet e mira mes dy vendeve.

“Në kundërshtim me praktikat ndërkombëtare dhe Konventën e Vjenës për Marrëdhënie Diplomatike, sigurimi i Aeroportit të Shkupit ka tentuar ta marrë telefonin personal të Presidentes. Presidentja nuk ka lejuar një gjë të tillë, sepse do të ishte shkelje e rëndë. Përkundër shpjegimit të rregullave qe ekipi i Presidentes ia ka bërë të ditur zyrtarit të aeroportit, ai ka tentuar fizikisht ta shtyjë Presidenten me ç’rast është detyruar që të reagojë Policia e Kosovës për ta hapur rrugën”, ka thënë Bekim Kupina, këshilltar i Presidentes Vjosa Osmani.

Ndërkohë, pas kësaj ngjarje dhe denoncimit të bërë nga presidenca e Kosovës, ka ardhur edhe reagimi nga pala maqedonase, që kanë theksuar se gjatë kalimit të presidentes Osmani janë zbatuar të gjitha protokollet.

“Sot (dje) rreth orës 10:00 në Aeroportin Ndërkombëtar të Shkupit, teksa presidentja Osmani po kalonte kontrollin kufitar, në momentin kur asaj iu kërkua që telefonin ta kalonte përmes skanerit, një person nga sigurimi i saj është larguar nga punonjësja e TAV-së, me qëllim që ajo të kalonte pa telefon të skanuar dhe bagazh dore”, ka thënë Ministria e Brendshme e Maqedonisë së Veriut.

Ngjarja ka ndodhur gjatë kohës që presidentja e Kosovës, po përdorte aeroportin e Shkupit si transit për një udhëtim jashtë vendit.

LEXONI GJITHASHTU:

• Vjosa Osmani takohet me këshilltarin për Siguri Kombëtare të Presidentit Biden
• Vjosa Osmani, politikania më e pëlqyer në Shqipëri