Soreca nga Elbasani: Të shqetësuar për blerjen e votës, por edhe shitja përbën vepër penale

Ambasadori i BE, ai gjerman dhe ambasadorja franceze ishin këtë të hënë në Elbasan ku zhvilluan takime me drejtuesit e partive në kuadër të zgjedhjeve parlamentare të 25 prillit. Nga ky qytet ata ngritën shqetësimin e shit-blerjes së votës, duke thënë se ajo është vepër penale. Gjithashtu, diplomatët bën thirrje se zgjedhjet duhet të jenë të lira dhe të ndershme.

Kur na ndajnë edhe 6 ditë nga 25 prilli, dita kur qytetarët do t’i drejtohen kutive të votimit, trojka e ambasadorëve në Shqipëri zbarkoi në Elbasan. Këtë fillim jave, ambasadori i BE, Soreca, ai gjerman Zingraf dhe ambasadorja franceze Barsak zhvilluan takime me përfaqësuesit politike të PS, PD, Nismën “Thurje”. Takimi nuk u zhvillua vetëm me Lëvizjen Socialiste për Integrim për shkak të axhendës elektorale të kryetares Kryemadhi. Pas takimit diplomati i Bashkimit Evropian deklaroi se fushata elektorale duhet që të mbizotërohej nga programet e partive dhe jo nga sulmet.

“Donim të shikonim një fushatë të përqendruar tek programet, të përqendruar tek qytetarët shqiptarë dhe tek nevojat e tyre dhe jo të përqendruar tek sulmet dhe tek intimidimet. Ua përsëritëm këtë mesazh liderëve që takuam. Ajo çka është vërtetë e rëndësishme dhe mjaft thelbësore për ne është këto zgjedhje të jetë të lira të ndershme dhe transparente”, u shpreh ambasadori.

Në fjalën e tij ai theksoi se blerja por edhe shitja e votës përbëjnë vepra penale.

“Ne kemi dëgjuar për shqetësimet për blerje të votës, mos harroni që blerja e votës është një vepër penale, parashikohet nga neni 328 i kodit penal, por shtije votës, edhe kjo është vepër penale”, u shpreh Soreca.

“Ne do të jemi në vëzhgim të zgjedhjeve.  Këto zgjedhje janë tejet të rëndësishme edhe për të ardhmen e Shqipërisë në Bashkimin Europian”, përfundoi ambasadori.

Lexoni gjithashtu:

3 ambasadorë në Elbasan, takime me PS, PD, Nismën ”Thurje”, por jo me LSI