SPAK duhet të fuqizohet, Basha: Rama bllokon drejtësinë është pjesë e korrupsionit

Ish- kryetari i Partisë Demokratike, Lulzim Basha, ka akuzuar kryeministrin Edi Rama se sa herë ndodhin skandale që kanë lidhje me korrupsionin, pushton ekranet që ta luftojë atë .

Basha tha se sa herë që Rama shpall nisma kundër korrupsionit, më shumë para vidhen nga shqiptarët dhe kërkon fuqizimin e SPAK si e vetmja rrugë për të luftuar korrupsionin.

Ai gjithashtu thekson se propozimet e Partisë Demokratike për luftën kundër korrupsionit janë bllokuar në Kuvend.

 Deklarata e Plotë:

Sa herë i plasin skandalet e korrupsionit, si rasti i tmerrshëm i onkologjikut, pushton ekranet duke u përbetuar se tani do të luftojë korrupsionin.

E sa herë ndërmerr nisma gjoja kundër korrupsionit, më shumë para vidhen nga xhepat e shqiptarëve. Përmes propagandës synon të bllokojë drejtësinë, që ajo të mos të trokasë në derën e tij dhe t’u shesë shqiptarëve sapunin për djathë, sikur të gjithë janë të korruptuar veç ai jo.

A ka shqiptar që beson se kur janë kapur me presh në duar zëvendës kryeministri i korruptuar, ministra të korruptuar, kryebashkiak të korruptuar, drejtorët e përgjithshëm të korruptuar, drejtorët e bashkive të korruptuar, të gjithë të korruptuar, vetëm Edi Rama është i pakorruptuar?!

Të gjitha fijet e korrupsionit lidhen pas karrikes së tij, prandaj atij i duhet dëshpërimisht të kontrollojë SPAK, e për këtë përdor aleatët që ndajnë të njëjtin hall me të. Nëse vërtetë do të ishte për luftë kundër korrupsionit, fillimisht do të plotësonte kërkesat e SPAK, dhe për këtë ka propozimet tona, që me urdhër të tij janë kyçur në sirtaret e Kuvendit.

Me vepra Edi Rama është kampioni i korrupsionit, mbrojtësi më i fuqishëm i aferave korruptive dhe i promovimit të të korruptuarve.

Sot ka një rrugë për të luftuar korrupsionin, të mbështetet dhe fuqizohet SPAK. Të tjerat janë shfaqje elektorale, për të pastruar imazhin e nxirrë nga gjëmat që kanë shpopulluar vendin. Shqipëria meriton më shumë!

LEXONI GJITHASHTU:

• Mark Rutte emërohet shef i ri i NATO-s
• Mark Rutte do të jetë Sekretari i Përgjithshëm i NATO-s