SPAK kërkon rreth 250 vite burg për 33 të pandehur për trafik klandestinësh

Struktura e Posaçme Kundër Korrupsionit dhe Krimit të Organizuar ka kërkuar në total rreth 250 vite burg për 33 të pandehur, të akuzuar si pjesë e dy grupeve të strukturuara kriminale të përfshira në trafikimin e klandestinëve.

Sipas pretencës së paraqitur në gjykatë nga prokurorja Elida Kaçkini, për shumicën e të pandehurve janë kërkuar dënime nga 10 deri në 12 vite burg. Ata akuzohen për veprat penale: “Ndihmë për kalim të paligjshëm të kufijve”, kryer në formën e bashkëpunimit të veçantë; “Falsifikimi i letërnjoftimeve, pasaportave ose vizave”; “Falsifikimi i dokumentave”; “Grup i strukturuar kriminal”; “Kryerje e veprave penale nga organizata kriminale apo grupi kriminal”; “Falsifikimi i vulave, stampave ose formularëve”, si edhe “Prodhimi i mjeteve për falsifikim të dokumentave, prodhimi apo mbajtja e mjeteve për të kryer falsifikim të dokumentave”.

Sipas njoftimit, nëse shpallen fajtorë, 33 të pandehurit pritet të përfitojnë nga gjykimi i shkurtuar, që sillte dhe uljen e dënimit me një të tretën.

Pas paraqitjes së pretencës nga prokuroria, një prej avokatëve mbrojtës, i cili arriti të lexojë konkluzionet përfundimtare në seancë, deklaroi se SPAK ka arrestuar “disa hallexhinj” dhe po kërkon dënimin e tyre me nga 10 vite burg.

Sipas hetimeve, dy grupet e strukturuara kriminale, ekzistenca e të cilëve konsiderohet e provuar nga organi i akuzës, kanë operuar gjatë viteve 2022–2024. Ata dyshohet se kanë organizuar dhe ndihmuar kalimin e paligjshëm të kufijve detarë, ajrorë dhe tokësorë, kryesisht të shtetasve shqiptarë, drejt Mbretëria e Bashkuar, Shtetet e Bashkuara dhe Kanada.