Spanja mirëpret marrëveshjen SHBA-Iran dhe bën thirrje për dialog

Ministri i Jashtëm i Spanjës, Manuel Albares, ka përshëndetur njoftimin për arritjen e një marrëveshjeje mes Shteteve të Bashkuara dhe Iranit, duke e cilësuar atë një hap të rëndësishëm drejt uljes së tensioneve në rajon.

Në një reagim të publikuar në platformën X, Albares falënderoi ndërmjetësuesit për angazhimin e tyre dhe theksoi rëndësinë e garantimit të lundrimit të lirë dhe të sigurt përmes Ngushticës së Hormuzit, një nga korridoret më strategjike për tregtinë globale të energjisë.

“E mirëpres njoftimin e një marrëveshjeje midis Shteteve të Bashkuara dhe Iranit. Falënderoj ndërmjetësuesit për përpjekjet e tyre. Lundrimi i lirë dhe i sigurt nëpër Ngushticën e Hormuzit është thelbësor”, deklaroi ai.

Kryediplomati spanjoll shtoi se dialogu dhe negociatat mbeten mjetet më efektive për zgjidhjen e mosmarrëveshjeve ndërkombëtare dhe për ruajtjen e armëpushimeve, duke përfshirë edhe situatën në Liban.

Më herët gjatë ditës, kryeministri i Pakistanit, Shehbaz Sharif, njoftoi se SHBA-ja dhe Irani kishin arritur një marrëveshje pas negociatave intensive. Sipas tij, palët kanë rënë dakord për një ndalim të menjëhershëm dhe të përhershëm të operacioneve ushtarake në të gjitha frontet, përfshirë edhe Libanin.