Spanja nis kursimin e energjisë, kufizohen kondicionerët, fiken vitrinat e dyqaneve

Spanja ka nisur të zbatojë masat e kursimit të energjisë.

Zyrat, dyqanet, baret dhe restorantet nuk do të lejohen të mbajnë temperaturën e kondicionerit nën 27 gradë gjatë verës.

Nga kjo e mërkurë, vitrinat e dyqaneve do të fiken në orën 22.00

Në dimër, ambientet publike nuk do të mund të rrisin ngrohjen mbi 19 gradë celsius.

Nga 10 gushti një sërë masash të tjera do të hyjnë në fuqi në përpjekje për të përballuar sa më lehtë dimrin, pas frikës se Rusia mund të shkurtojë furnizimet me gaz në Evropë.

Pavarësisht një varësie të ulët spanjolle nga gazi rus, për kryeministrin spanjoll ky është një angazhim evropian.

“Duhet të respektojmë marrëveshjet që kemi arritur në Bruksel dhe solidaritetin, sepse pavarësisht se Spanja është më e përgatitur për shkak të vendndodhjes së saj gjeografike në krahasim me vendet e tjera që janë shumë më të varura nga gazi rus apo burimet ruse të energjisë, si p.sh. Gjermania, Italia dhe vende të tjera të Evropës Qendrore dhe Lindore, Spanja ka një angazhim solidariteti me vendet e tjera evropiane”, tha Pedro Sánchez, kryeministër i Spanjës.

Nga shtatori dyqanet gjithashtu do të detyrohen të mbajnë dyert e mbyllura dhe sistemet e ngrohjes do të duhet të kontrollohen më shpesh për të rritur efikasitetin e tyre.

Një masë e pranuar pa shumë dëshirë.

“Do të jetë e pamundur, sepse tani jemi në 18 gradë. Nëse shkojmë deri në 27 gradë, do të djersitemi gjithë ditën, nuk do të kemi nevojë të shkojmë në palestër. Frigoriferët japin shumë nxehtësi”, shprehet Eric Muller, shitës akulloresh.

“Nëse dilni për një shëtitje ajo që dëshironi të shihni është lumturi, sepse në lagjen tuaj nuk shihni të njëjtat drita. Pra, nëse vendosni të vini në Gran Via dhe gjithçka është e fikur, do të pyesni veten se çfarë po ndodh”, thotë Javier Reine, pronar i stendës së pijeve.

Spitalet, qendrat shëndetësore, shkollat, parukeritë dhe mjetet e transportit janë të përjashtuar nga masat e kursimit të energjisë.

LEXONI GJITHASHTU:

• Katar 2022/Franca miraton plan të rreptë sigurie
• Nga 1 gushti Franca heq të gjitha masat anti-COVID