Specialistja e vaksinimit thirrje qytetarëve: Grupmoshat mbi 70 vjeç t’i drejtohen mjekut të familjes

Procesi i vaksinimi masiv në Shqipëri tek moshat mbi 70 vjeç vijon që prej ditës së djeshme.

Specialistja e programit kombëtar te vaksinimit, Iria Preza tha për Euronews Albania se krahas vaksinimit të moshave mbi 70 vjeç, dozën e vaksinës po e marrin mjekët, pedagogët, mësuesit dhe stafet e shkollave.

“Aktualisht janë duke u vaksinuar të gjitha grup-moshat duke filluar nga mosha 70 vjeç e sipër. Vazhdon vaksinimi i mjekëve, mësuesve, pedagogëve dhe stafeve që punojnë nëpër shkolla”, tha ajo.

Ajo tha se kjo kategori personash, duhet të komunikojnë me mjekun e familjes për të përcaktuar vendin, ditën dhe orën se kur duhet të marrin injeksionin e vaksinës kundër pandemisë Covid-19.

“Duhet që gjithmonë që grupmoshat mbi 70 vjeç t’i drejtohen mjekut të familjes se kur do të kryejnë vaksinën. Mjeku i familjes është hallka kryesore, ku persona që janë në këtë kategori mbi 70 vjeç, marrin informacionin dhe saktësohet vendi, ora dhe dita kur duhet të paraqiten”, theksoi ajo.

Pyetur nga gazetarja Bruna Çifligu se kur pritet që procesi i vaksinimit të shtrihet tek moshat poshtë 70 vjeç, për këtë znj.Preza theskoi se puna po vijon me ritme të shpejta teksa kërkoi durim dhe mirëkuptim nga qytetarët.

“Në po kryejmë mbi 10 mijë vaksinime në ditë kjo tregon se po bëjmë një vaksinim më të shpejtë. Duhet pak durim dhe duhet pak mirëkuptim dhe duhet të respektojmë njoftimet dhe strategjinë, sepse të gjithëve u ofrohet mundësia për t’u vaksinuar”,  shtoi ajo.