Spitali i ri i Laçit, Rama: Nisin punë mjekë të rinj, do ketë rritje rrogash

Kryeministri Edi Rama dhe ministrja e Shëndetësisë Ogerta Manastirliu inspektuan këtë të hënë spitalin e ri të Laçit, të cilin e konsideruan një model për spitalet bashkiake në vend.

Kryeministri premtoi se do të rriten sërish rrogat e mjekëve dhe infermierëve ndërsa tha se uron që së shpejti të kenë lajm të mirë për pensionistët.

“Unë thjesht dëshiroj të falënderoj dhe miqtë e Kishës që ishin sot të pranishëm dhe i bënë bekim spitalit. Me atë rast mora dhe unë disa pika uji që shpresoj të më sjellin mbarësi. Me sigurinë që pasi u rritën rrogat edhe një herë për ju, do vijojmë t’i rrisim sërish përtej vështirësive që kemi, sepse është e rëndësishme që në këtë fazë kritike, të vijojmë të mbështesim. Rrogat do vazhdojnë të rriten për të gjithë ata që punojnë në sistemin shëndetësor dhe shpresoj që së shpejti të kemi lajm të mirë për pensionistët, edhe pse gjithmonë ndaj tyre do të jemi në borxh”, tha Rama.

Ai nënvizoi se në spitalin e Laçit nisin punë dhe mjekë të rinj dhe nuk ka vetëm largime.

“Jo të gjithë ikin, në spitalin e Laçit nisin punë mjekë të rinj. Unë shpresoj që të na votojnë më shumë në Laç. Ne kemi detyrim që t’u garantojmë shërbim, pavarësisht sesa na votojnë. Kemi punuar shumë për ta rilindur këtë zonë”, u shpreh ai.

LEXONI GJITHASHTU:

• Qyno: Gjendja e policisë aq e rëndë, sa Rama kthen sytë nga ‘grupi çiftelia’