Spiun rus në Gjermani? ‘Ushtria gjermane ka municione vetëm për 2 ditë!’

Gjermania ka prodhuar lajme të njëpasnjëshme ditët e fundit nga zbulimi i një spiuni rus në qeveri deri tek pyetja që ka alarmuar të gjithë – a është gati Gjermania për luftë?

Si fillim, shefi i sigurisë kibernetike të Gjermanisë po përballet me shkarkimin për shkak të lidhjeve të tij me Rusinë.

Ministrja e Brendshme e Gjermanisë, Nancy Faeser, po kërkon të shkarkojë shefin e agjencisë federale për sigurinë kibernetike, Arne Schönbohm, për kontaktet e tij të dyshuara me agjentë të shërbimeve të sigurisë ruse, raportuan të dielën gazetat gjermane.

Schönbohm është president i Zyrës Federale për Sigurinë e Informacionit (BSI).

Megjithatë, një hetim i fundit zbuloi se ai ishte gjithashtu anëtar i një shoqate teknologjike që është kritikuar për lidhjet e saj me Rusinë. Një nga anëtarët e shoqatës është një kompani gjermane që është një degë e një firme ruse të sigurisë kibernetike e themeluar nga një ish-punonjës i KGB-së.

Ministria e Brendshme tha të hënën se “i merr seriozisht çështjet e raportuara gjatë fundjavës dhe po i heton ato në mënyrë gjithëpërfshirëse”.

Një paraqitje e përbashkët e planifikuar e Faeser dhe Schönbohm të enjten për të paraqitur Raportin e Situatës BSI 2022 thuhet se është anuluar.

Ndërkohë një situatë edhe më shqetësuese është raportuar ditën e djeshme në mediat gjermane, të cilat pretendojnë se kombi është i papërgatitur për një konfrontim të armatosur pasi furnizimi i tij me municione do të zgjaste vetëm dy ditë.

Raportet thonë se municionet e Berlinit do të zgjasin “vetëm 2 ditë në një luftë” ndërsa vendi vazhdon të armatosë Ukrainën.

Gjatë një interviste me median perëndimore Business Insider, komisionerja e mbrojtjes për parlamentin gjerman, Eva Hoegl, tha se Gjermania po kërkonte 20 miliardë euro për të blerë municion të mjaftueshëm për të përmbushur kërkesat e NATO-s.

“Në të njëjtën kohë, ne nuk kemi kapacitet të mjaftueshëm magazinues. Kjo tregon se duhen bërë më shumë përpjekje”, tha ajo.

Objektivi i NATO-s për grumbullimin e municioneve adekuate për 30 ditë betejë është larg nga arritjet e Gjermanisë. Dhe përveç kësaj, qeveria federale ka vazhduar të dërgojë municione drejt Ukrainës duke i ofruar asaj armë nga stoku i Bundeswehr-it.

A është Gjermania gati për luftë? A ka municion të mjaftueshëm në rast konflikti ushtarak? Këto janë pyetje që nuk shqetësojnë vetëm gjermanët.

Ukraina mbështetet shumë në sistemet e armëve perëndimore për të luftuar ushtarët rusë. Dhe aleatët e saj perëndimorë, kryesisht vendet e NATO-s, e kanë furnizuar veçmas Ukrainën me një gamë të gjerë armësh ushtarake.

Gjermania ka dërguar tashmë shumë armë në Ukrainë, duke përfshirë 50 raketa bunker-buster, 21.8 milionë fishekë për armë zjarri dhe 53,000 fishekë për armë kundërajrore.

Në gusht, Ministrja e Jashtme gjermane Annalena Baerbock deklaroi se Gjermania nuk mund të furnizonte më shumë armë për Ukrainën nga rezervat e saj ushtarake për shkak të mungesës së madhe të pajisjeve.

Thënë kjo, Gjermania nuk është i vetmi komb me një rezervë të ulët municionesh; Franca gjithashtu thuhet se është përballur me një situatë të ngjashme.

Çfarë do të thotë kjo për Europën? A po rrezikon ajo të shterojë rezervat e saj të armëve duke ndihmuar Ukrainën? Dhe sa gjatë mund të vazhdojë ajo ta bëjë këtë?

LEXONI GJITHASHTU: 

• Shqetësuese: A do ta zgjidhte ngrohjen globale një ‘luftë e vogël bërthamore’?
• Koreja e Veriut konfirmon përgatitjet për sulm bërthamor – çfarë dihet deri tani?
• Çfarë ishte kaq e ‘tmerrshme’ rreth planit të paqes që propozoi Elon Musk?