Spiunonte për Rusinë nga Ukraina, arrestohet në Kiev ish-ushtaraku britanik

Një britanik, një ish-anëtar i forcave të armatosura të vendit të tij, po mbahet në Ukrainë nën dyshimin për spiunazh për Rusinë, sipas SBU-së ukrainase .

Ross David Cutmore, rreth 40 vjeç, u arrestua tetorin e kaluar në shtëpinë e tij në Kiev. Autoritetet ukrainase zbuluan sot emrin e tij dhe më shumë informacion rreth tij.

Cutmore kishte mbërritur në Ukrainë disa muaj më parë për të trajnuar luftëtarë, por autoritetet ukrainase zbuluan aktivitetet e tij të vërteta me ndihmën e inteligjencës britanike.

SBU njoftoi se britaniku, i cili u paraqit si instruktor ushtarak, në fakt ishte rekrutuar nga FSB-ja ruse, me joshjen e “parave të lehta”. Sipas autoriteteve ukrainase, atij i ishin siguruar armë dhe municione “për të kryer vrasje të synuara në territorin e Ukrainës”.

Sipas raportimeve, burri “është në paraburgim dhe hetimi është duke vazhduar”, pa dhënë detaje të mëtejshme. Mediat ukrainase raportuan se ai ishte aktiv në vend gjatë periudhës 2024-2025 dhe akuzohet për kryerjen e “veprimeve të zbulimit dhe sabotimit” në emër të Moskës.

LEXONI GJITHASHTU:

• Zelensky: Ukraina i merr bisedimet e paqes me seriozitetin më të madh
• Kremlini: Evropa po tenton të vjedh paratë ruse për të financuar makinerinë e luftës