Zyrtarët në Tajvan kanë deklaruar se Kina është duke kryer stërvitje ushtarake, të cilat duket se po simulojnë një sulm në këtë ishull.

Stërvitja ushtarake e Kinës shihet si përgjigje ndaj vizitës që ka kryer në Tajvan udhëheqësja e Dhomës së Përfaqësuesve në Shtetet e Bashkuara, Nancy Pelosi, shkruan Reuters.

Ministria për Mbrojtje Kombëtare ka thënë më 6 gusht se forcat e armatosura të Tajvanit kanë lëshuar një alarm dhe kanë dërguar patrulla ajrore dhe detare rreth ishullit.

Sipas ministrisë, 20 aeroplanë kinezë dhe 14 anije kanë vazhduar të kryejnë stërvitje në det dhe ajër rreth Ngushticës së Tajvanit.

Sekretari amerikan i Shtetit, Antony Blinken, ka dënuar stërvitjet ushtarake kineze afër Tajvanit, duke i konsideruar si përshkallëzim të konsiderueshëm dhe ka thënë se nuk ka arsye për veprime të tilla.

Kina dhe Tajvani janë ndarë gjatë luftës civile më 1940, por Pekini insiston se ishulli do t’i kthehet dikur dhe është e gatshme të ndërhyjë ushtarakisht.

LEXONI GJITHASHTU

• SHBA dënon stërvitjen ushtarake të Kinës rreth Tajvanit
• Kina lëshon raketa afër Tajvanit pas vizitës së Pelosit
• Përplasjet Kinë-Tajvan, si nisën tensionet mes ishullit të vetëqeverisur dhe Pekinit