Strategjia e PD-së për mbrojtjen e votës, strukturë e posaçme për evidentimin e çdo rasti të shkeljes së ligjit

Përgatitjet për mbrojtjen e votave në 25 prill, Partia Demokratike i ka nisur shumë më herët.

Në selinë blu, është ngritur tashmë një strukturë e posaçme që do të bëjë evidentimin e çdo shkeljeje të Kodit Zgjedhor.

Në një intervistë për Euronews Albania, drejtuesja e kësaj strukture shpjegon cili do të jetë qëllimi i saj dhe si do të funksionojë.

“Është një strukturë e organizuar nga juristët më të mirë që ka vendi, nga juristë, penalistë dhe profesionistë të tjerë të fushave të ndryshime. Fokusi kryesor është monitorimi i shkeljes ë ligjit dhe analiza e shkeljes së ligjit dhe më pas raportimi i tyre dhe denoncimi në KQZ, në prokuroritë e rretheve, në SPAK”, u shpreh Marinela Ziu.

Deri më tani kjo strukturë ka referuar disa raste të tilla në Komisionin qendror të zgjedhjeve dhe në organet ligjzbatuese.

“Ne jemi diku tek 50 raste të depozituara në prokurorinë e rretheve dhe 19 raste ne SPAK, një pjesë është në provës”, u shpreh ajo më tej.

Ziu tregon se disa nga shkeljet më të shpeshta të kodit janë përdorimi i aseteve publike, apo i administratës për fushatë, por sipas saj nuk kanë munguar edhe elementët kriminalë në procesin zgjedhor.

“Ne jemi organizuar jo vetëm këtu në selinë qendrore, por në të gjitha degët e PD-së. Kemi informacione të pafundme”, tha ajo më tej.

Sipas drejtueses, struktura për mbrojtjen e votës nuk ka në fokus vetëm fushatën elektorale, por edhe ditën e zgjedhjeve dhe procesin e numërimit.