Strehimi i Gruevskit, Novak: Këto çështje i takojnë gjyqësorit

Hungaria nuk përgjigjet lidhur me azilin e dhënë ish-kryeministrit Nikolla Gruevski në vitin 2018 edhe pse ai është në listën e zezë amerikane dhe është dënuar me mbi 20 vite burg në Maqedoninë e Veriut.

Presidentja hungareze Katalin Novak ishte këtë të hënë në Shkup, teksa tha se vendim i takon sistemit gjyqësor hungarez që është tërësisht i pavarur në vendime.

“Në lidhje me rastin Gruevski, dua të them se është në juridiksionin e gjyqësorit tonë, I cili vepron I pavarur në vendime. Jam shumë e lumtur që gjatë vizitës sime u binda se bashkëpunimi ynë i ndërsjellë po ndërtohet dhe zhvillohet me sukses,” – u shpreh Novak.

Presidentja hungareze shprehu mbështetjen e plotë për anëtarësimin e Maqedonisë së Veriut në BE, ndërsa homologu maqedonas falënderoi këtë shtet për mbështetjen në çdo moment të vështirë.

“Kjo vizitë është domethënëse për zhvillimin e marrëdhënieve dypalëshe. Hungaria është një nga anëtarët më të zëshëm dhe më aktivë të BE në mbështetjen e procesit të zgjerimit për vendet e Ballkanit Perëndimor dhe një vend që luajti një rol të rëndësishëm në vendimin për fillimin e negociatave të anëtarësimit të Maqedonisë së Veriut,” – tha presidenti i Maqedonisë së Veriut, Stevo Pendarovski.

Dy shtetet do të intensifikojnë më shumë bashkëpunimin edhe në sferën e emigracionit ilegal pasi Maqedonia e Veriut është pjesë e rrugës që çon emigrantët drejt kufijve hungarezë.

LEXONI GJITHASHTU:

• 1400 të vetëvrarë, shifra alarmante në RMV, 33 viktima në 3 muajt e fundit
• Shqiptarët në qeverinë e RMV, Arben Taravari kërkon Ministrinë e Shëndetësisë