Studimi: ChatGPT Health nuk është gjithmonë i besueshëm për raste urgjente

Mbi 230 milionë persona në javë përdorin inteligjencën artificiale për këshilla shëndetësore, por një studim i ri tregon se ChatGPT Health nuk është gjithmonë i besueshëm për raste urgjente.

Sipas të dhënave të OpenAI, përdoruesit drejtohen tek ChatGPT për pyetje të ndryshme, që nga ushqimi dhe alergjitë, deri te trajtimi i simptomave të ftohjes. Megjithatë, studimi i publikuar në revistën shkencore Nature ka gjetur se më shumë se 50% e rasteve që kërkonin ndihmë urgjente nuk u identifikuan saktë nga sistemi.

Studiuesit testuan 60 skenarë klinikë në 21 specialitete mjekësore, nga rastet e lehta deri te urgjencat serioze, duke i krahasuar me vlerësimin e tre mjekëve të pavarur. Rezultatet treguan se ChatGPT reagonte saktë në situata të qarta, si goditja në tru apo reaksionet e rënda alergjike, por kishte vështirësi kur rreziku nuk ishte i dukshëm menjëherë.

Analiza përfshinte edhe rastet kur përdoruesit shpreheshin për vetëdëmtim. Studiuesit vunë re se mesazhet që inkurajonin kërkimin e ndihmës nuk shfaqeshin gjithmonë në mënyrë të qëndrueshme.

Megjithatë, autorët e studimit theksuan se njerëzit nuk duhet të heqin dorë nga përdorimi i inteligjencës artificiale për shëndetin, por simptomat serioze, si dhimbja në gjoks, vështirësitë në frymëmarrje apo reaksionet e rënda alergjike, duhet të vlerësohen gjithmonë nga mjekët dhe jo vetëm nga chatbot-et.