Studimi global: Hidroksiklorokina jo efektive tek pacientët me COVID-19

Hidroksiklorokina, apo ilaçi kundër malaries, nuk ka sjellë përmirësime tek pacientët me COVID-19, si dhe ka shtuar rrezikun e vdekjes e problemet me rrahjet e zemrës, sipas një studimi të ri global.

Studimi është kryer tek 100 mijë pacientë mbartës të COVID-19 në 671 spitale nga muaji dhjetor i 2019 deri në prill të 2020.  

I publikuar në “The Lancet”, në këtë studim janë përfshirë 14.888 persona të cilët u trajtuan me hidroksiklorokinë ose klorokinë.

Hidroksiklorokina është përfolur gjatë si një trajtim i mundshëm kundër COVID-19, qëkur doktor Didier Raoult tha se po trajtonte pacientët e tij në Marsejë me këtë medikament në kombinim me antibiotik.

Sot ai po ekzaminohet në disa teste klinike në mbarë botën, duke përshirë dhe nga Organizata Botërore e Shëndetësisë.

Analiza e re globale zbuloi se ky medikament nuk kishte sjellë përmirësim tek pacientët me COVID-19, por në fakt kishte shtuar rrezikun e vdekjes dhe problemet me zemrën.

Rreth 9 për qind e pacientëve të testuar humbën jetën, krahasuar me rreth 16 për qind e atyre që po trajtoheshin me klorokinë.

Studimi zbuloi edhe risk më të lartë për ata që u trajtuan me hidroksiklorokinë dhe antibiotik.

Rreth 22 për qind e pacientëve të trajtuar me klorokinë dhe antibiotik vdiqën e po ashtu dhe 23 për qind e atyre që u trajtuan me hidroksiklorokinë dhe antibiotik, thuhej në studimin.

Klorokina është një ilaç që përdoret që prej viteve 1940 për të trajtuar malarien ndërsa hidroksiklorokina është një derivat i tij por më pak toksik, megjithatë ai sjell efekte të forta anësore si dhimbje koke, marrje mendsh, të vjella dhe në disa raste probleme me zemrën.