Studimi: Në Shqipëri mbizotëron gjuha e urrejtjes

Një studim i fundit, fryt i i bashkëpunimit midis Komisionerit kundër Diskriminimit, Bashkimit Europian dhe Këshillit të Europës, ka paraqitur disa të dhëna mbi gjuhën e urrejtjes në Shqipëri.

Sipas studimit, afro 60% e të anketuarve mendojnë se gjuha e urrejtjes mbizotëron masivisht në vend.

Në grupet më të ndjeshme prej diskriminimit, 9 nga 10 të anketuar mendojnë se gjuha e urrejtjes është shumë e përhapur.

Studimi i publikuar bazohet në reagimet e mbi 1.800 personave të anketuar.

Pjesa më e madhe e tyre, afro 70%, pohuan se programet më të zakonshme televizive që përhapin më shpesh gjuhë të urrejtjes janë debatet politike dhe më pak shfaqjet e realitetit.

Më shumë se gjysma e të anketuarve mendojnë që motivet më të zakonshme që ngacmojnë gjuhën e urrejtjes janë varfëria, statusi social, opinioni politik, paraqitja fizike, etnia dhe raca.

Gratë janë ato që mendojnë më shumë se gjuha e urrejtjes nxitet nga paraqitja fizike, ndërsa burrat mendojnë se gjuha e urrejtjes nxitet më shumë nga opinioni politik.

“Gjuha e urrejtjes përdoret më së shumti në media sociale, shkolla, universitete dhe vendet e punës. Më shumë se gjysma e të anketuarve pohojnë se kanë reaguar me veprime, kur kanë qenë dëshmitarë të gjuhës së urrejtjes ndaj dikujt tjetër. Aleanca kundër urrejtjes ka shumë punë për të bërë në Shqipëri” – thotë Robert Gajda, komisioneri për Mbrojtjen nga Diskriminimi.

Afro 60 % e të anketuarve nga grupet në nevojë e kanë përjetuar personalisht gjuhën e urrejtjes dhe po aq kanë dëgjuar për të tjerë që e kanë përjetuar.