Studio e Euronews në Prishtinë, gazetari: Nuk ka fitues të zgjedhjeve pa koalicion

Analisti Lavdim Hamiti deklaroi në studion e Euronews Albania në Prishtinë se zgjedhjet e sotme në Kosovë nuk do të kenë një fitues të qartë.

Hamiti tha se asnjë parti nuk mund të sigurojë 61 mandate dhe se do të jenë të detyruara të krijojnë një koalicion qeverisës.

“Asnjë subjekt politik nuk duhet të jetë në gjendje të sigurojë i vetëm shumicën, qoftë edhe për ta formuar qeverinë me 61 vota. Problemi nuk është vetëm te qeveria, sepse kemi edhe një tjetër çështje: në shkurt duhet të zgjidhet edhe presidenti, gjë që kërkon një koalicion më të gjerë, me së paku 80 vota në Kuvendin e Kosovës. Besoj se kjo do t’i detyrojë të gjitha subjektet kryesore politike të bashkëpunojnë mes tyre për të formuar institucionet e reja”, tha ai.

I pyetur nga gazetari Franko Egro se çfarë do të prodhojnë këto zgjedhje, Hamiti tha se para se gjithash këto zgjedhje duhet të shërbejnë për të shmangur krizat e ardhshme.

“Pasi të konfirmohet rezultati zgjedhor për secilin subjekt politik, atëherë do të ulen dhe, besoj, do të formohet një koalicion i cili do të zgjedhë edhe presidentin, në mënyrë që të shmangen zgjedhjet e reja parlamentare. Do të jetë një koalicion i qëndrueshëm për të udhëhequr vendin në katër vitet e ardhshme, pa e detyruar vendin në zgjedhje të vazhdueshme, sepse këto kanë kosto për vendin”, tha Hamiti.