Subvencionimi i naftës, fermerët e Beratit ankohen për vonesa në bankë  

Skema e re e subvencioneve të naftës ka sjellë kaos midis fermerëve. Veç faktit që aplikimi bëhet online, ata do të duhet të disponojnë një llogari në bankat e nivelit të dytë për të marrë paratë. Çelja e llogarive ka krijuar dhe radhë të gjata në dyert e bankave në Berat.

“12 dynym, çdo vit, vjet aplikova dhe sivjet. Vetëm në bankë këtu nuk merr dot numër llogarie. as dimë gjë fare, thonë që do të jepen lekë nuk do të jepet naftë, nuk dimë”, thotë një fermer.

Vonesat nëpër dyert e bankave, sipas fermerëve, po i penalizojnë që të kryejnë aplikimin për të përfituar subvencionin në kohë.

“Jo nuk e kam mbyllur, po bëj nja tre ditë aty dhe ata fusin jashtë radhe, çfarë t’i besh. Tani na jep na një numër, tallet, është tjetër aplikimi. Nuk kam vajtur fare unë, s’kam mbaruar punë këtu”, shprehet një tjetër.

Ndryshe nga vitet e kaluar, këtë vit fermerët nuk do tërheqin naftë, por do të subvencionohen me lekë, shumë e cila është llogaritur sipas një skeme referuar tabelës për normativat e konsumit të naftës, ku përllogaritet vlera e përfitimit sipas kulturave të të mbjellave.