Sulm nga Rusia në Ukrainë, shuhet një familje me 4 anëtarë! Mes tyre një 15-vjeçare

Pesë persona kanë humbur jetën dhe dhjetëra mijëra kanë mbetur pa energji elektrike në Ukrainë pas një vale të rëndë sulmesh me raketa dhe dronë nga Rusia gjatë natës, ka deklaruar Presidenti ukrainas Volodymyr Zelensky.

Katër anëtarë të një familjeje, përfshirë një vajzë 15-vjeçare, u vranë nga një sulm në fshatin Lapaivka, ndërsa shumica e sulmeve kishin në shënjestër rajonin perëndimor të Lvivit.

Fqinji i Ukrainës, Polonia, ngriti në ajër avionë luftarakë për të garantuar sigurinë e hapësirës ajrore polake, ka konfirmuar ushtria polake. Në përgjigje u angazhuan gjithashtu edhe avionë të NATO-s.

Ministria ruse e mbrojtjes tha se kishte kryer me sukses një “sulm masiv” ndaj objektivave ushtarake dhe infrastrukturës në Ukrainë.