Sulme izraelite në Bregun Perëndimor, 32,000 palestinezë të zhvendosur

Dhjetëra mijëra palestinezë janë detyruar të ikin nga një inkursion i vazhdueshëm izraelit në kampet e refugjatëve në Bregun Perëndimor verior, tha agjencia e OKB-së për refugjatët palestinezë, UNRWA.

Rolan Friedrich, drejtor i çështjeve të UNRWA-së për Bregun Perëndimor, tha se sulmi izraelit zbrazi kampet e refugjatëve në Jenin, Tulkarem dhe Nur Shams, duke zhvendosur rreth 32,000 banorë.

“E megjithatë, edhe në këto qytete që dikur ishin kampe të gjalla, forcat izraelite ende e shohin nevojën për të urdhëruar prishje për hir të të ashtuquajturave qëllime ushtarake”, tha Friedrich në një deklaratë.

Ai vuri në dukje se autoritetet izraelite lëshuan dy urdhra për prishje masive të rreth 190 ndërtesave në kampin e refugjatëve në Jenin, ndërsa 12 të tjera do të shemben në ditët në vijim, gjë që shënon “episodin më të ri në përpjekjet e vazhdueshme për të ridizajnuar topografinë e kampeve të refugjatëve në Bregun Perëndimor verior”.

Zyrtari i UNRWA-së tha se shkatërrimi sistematik i Izraelit shkel parimet themelore të së drejtës ndërkombëtare dhe zgjeron kontrollin e ushtrisë në planin afatgjatë.

Friedrich bëri thirrje për rindërtimin e kampeve të refugjatëve dhe kthimin e banorëve të zhvendosur.

“Ata nuk duhet të mbeten të bllokuar në zhvendosje të pafundme”, tha ai.

LEXONI GJTIHASHTU:

• Rritet në 69.785 numri i palestinezëve të vrarë nga sulmet izraelite në Gaza
• Armëpushimi në Gaza “vetëm në letër”, Izraeli e ka shkelur rreth 500 herë në 44 ditë