Sulmet ukrainase| Rusët vijojnë betejën me flakët, depozitat në zjarr

Autoritetet ruse vazhdojnë përpjekjet për të vënë nën kontroll një zjarr që ra në një depozitë nafte pasi u godit nga dronët ukrainas 3 ditë më parë.

Sipas agjencive shtetërore të lajmeve, zjarri ka djegur një sipërfaqe prej 10 mijë metrash katrorë në qytetin Proletarsk, në rajonin e Rostovit.

Burimet mediatike saktësojnë se janë rreth 500 zjarrfikës që po përpiqen të asgjësojnë flakët, 41 prej të cilëve janë dërguar në spital për shkak të lëndimeve të marra.

Shtabi i Përgjithshëm i ushtrisë ukrainase ka marrë përsipër përgjegjësinë e sulmit ndaj depozitës, që përdorej për të furnizuar trupat ruse.

Episodi vjen teksa Moska po përpiqet të frenojë inkursionin e Kievit në rajonin e Kurskut. Pamje të reja satelitore tregojnë ushtrinë ruse që po ngre ura të përkohshme për të zëvendësuar ato të hedhura në erë nga trupat ukrainase.

Ministria ruse e Mbrojtjes ka publikuar gjithashtu pamje filmike që sipas saj tregojnë trupat e ushtarëve dhe autoblindave ukrainase të shkatërruara në rrugët e Kurskut.

Ndërkohë, në zona të tjera, Kremlini deklaroi se kishte shkatërruar një depo armatimesh ukrainase në rajonin Sami dhe një artileri në Kharkiv.

LEXONI GJITHASHTU:

• Kryeministri i Indisë pritet të vizitojë Ukrainën
• Rusia konfirmon se forcat ukrainase kanë dëmtuar urën e tretë në Kursk