Sulmi i dështuar në një bankë në Paris, autoritetet dyshime ndaj grupit pro-iranian “HAYI”

Franca dyshon se një grup pro-iranian i njohur si HAYI qëndron pas një sulmi të dështuar në zyrat e Bank of America në Paris. Prokurori i antiterrorizmit shtoi se lidhja ende nuk është vërtetuar zyrtarisht.

Sipas tij, HAYI kishte postuar një video në mediat sociale më 23 mars duke synuar interesat dhe komunitetet hebraike në Francë dhe Evropë.

Burime të sigurisë thonë se duket se po përdoret një model i lidhur më parë me Iranin për të rekrutuar grupe kriminale ose kriminelë të vegjël për të kryer sulme.

“Pas komplotit të dështuar me bombë nga inteligjenca iraniane në Paris në vitin 2018, iranianët iu drejtuan bandave kriminale të paguara për të kryer incidente, kështu që është më e vështirë që të gjurmohet deri në Teheran”, tha një diplomat i lartë perëndimor.

“Këto operacione synojnë kundërshtarët dhe elementët e lidhur me hebrenjtë. Ka pasur një mori të tilla në të gjithë Evropën. Pritjet tona janë që Irani tani do të fillojë të aktivizojë këto rrjete”, tha ai.

Autoritetet franceze ende nuk kanë identifikuar ndonjë kërcënim të ri, por skenari është i besueshëm, thanë dy burime sigurie për Reuters.

Katër të dyshuar u vunë zyrtarisht nën hetim. Një person i pestë u lirua për mungesë provash të mjaftueshme.

Hetuesit përcaktuan nëpërmjet pamjeve të kamerave të sigurisë, të dhënave telefonike dhe intervistave me policinë se njëri prej të dyshuarve kishte rekrutuar tre adoleshentë midis netëve të 26 dhe 27 marsit, duke i paguar ata midis 500 dhe 1.000 eurove për të vendosur pajisjen, për ta ndezur dhe për të filmuar skenën.

Të katër të dyshuarit mohuan qëllimin terrorist, megjithëse të miturit pranuan se e dinin se objektivi nuk ishte një ndërtesë banimi. Prokurori shtoi se prioriteti i hetuesve tani është të identifikojnë organizatorët e sulmit.