Sulmi kibernetik nga Irani, rikthehet në funksion sistemi TIMS në Rinas

Ministria e Brendshme dhe Drejtoria e Kufirit dhe Migracionit kanë konfirmuar se sistemi TIMS në Aeroportin Ndërkombëtar “Nënë Tereza” është rikthyer totalisht në funksion gjatë mëngjesit të sotëm, pas punës që kanë kryer ekspertët e IT-së, së bashku me aleatët.

Gazetari i “Euronews Albania”, Eni Ferhati raporton se aktualisht, në Rinas duket një ditë normale dhe nuk ka radhë të pasagjerëve.

Tanimë që sistemi është rikthyer në punë, nuk besohet se do të ketë probleme, megjithëse është punuar edhe me regjistra manualë, ku për këtë u desh edhe shtimi i stafit të Policisë Kufitare dhe Migracionit për të mos pasur radhë të gjata dhe humbje të fluturimeve.

Ndërsa, ditën e djeshme, u rikthyen në punë vetëm dy sportele të sistemit TIMS, për të parë nëse sistemi kishte integritet apo ishte sërish i cënueshëm.

Kryeministri Edi Rama njoftoi mëngjesin e së shtunës se hakerat iranianë kanë sulmuar sistemin TIMS.

LEXONI GJITHASHTU

• ‘Aktivitet dashakeqës’, SHBA-të reagojnë pasi Irani sulmoi sistemin TIMS në Shqipëri
• Rikthehet sistemi TIMS në 2 sportele të Rinasit pas sulmit kibernetik
• Hakerat iranianë sulmojnë sistemin TIMS, thotë Rama