Udhëheqësi suprem iranian Ayatollah Ali Khamenei ka reaguar në lidhje me bombardimet masive të Izraelit në jugin e Libanit, përfshirë Beirutin.
Lideri iranian deklaroi se Libani do ta bëjë Izraelin të “pendohet për veprimet e tij”.
“Fati i këtij rajoni do të përcaktohet nga forcat e rezistencës, me Hezbollahun në ballë”, tha Khamenei.
“Forcat e rezistencës” të cilës i referohet Khamenei, duket se janë referencë për Boshtin e Rezistencës, koalicionin e grupeve të armatosura të lidhura me Iranin, përfshirë Hamasin, Hezbollahun dhe Houthitë e Jemenit.
“Banda terroriste që sundon regjimin sionist nuk mësoi nga lufta e tyre kriminale njëvjeçare në Gaza dhe nuk arriti të kuptonte se vrasja masive e grave, fëmijëve dhe civilëve nuk mund të ndikojë në ndërtimin e fortë të organizatës së rezistencës dhe ta shkatërrojë atë” ka shtuar Khamenei.
“Tani ata po provojnë të njëjtën politikë marrëzie në Liban.”
Ai shtoi se Izraeli është “shumë i vogël” për t’i shkaktuar dëme të konsiderueshme Hezbollahut, pavarësisht se Izraeli pretendonte se kishte vrarë liderin e grupit, Hassan Nasrallah.
“Të gjitha forcat e rezistencës të rajonit janë me Hezbollahun dhe e mbështesin atë”.
Kujtojmë se ushtria izraelite njoftoi mëngjesin e kësaj të shtune se lideri i Hezbollahut, Hassan Nasrallah u vra gjatë sulmeve ajrore në Beirut.
“Hassan Nasrallah nuk do e shqetësojë më botën”, shkroi ushtria izraelite në platformën X.
Vdekja e Nasrallah nuk është konfirmuar ende nga grupi militant i Hezbollah.
LEXONI GJITHASHTU:
- IDF: Lideri i Hezbollahut Hassan Nasrallah është vrarë
- Truri i Hezbollah, kush është lideri i grupit militant që Izraeli pohon se ka vrarë
