Dy oficerë burgu u vranë dhe tre të tjerë u plagosën rëndë pasi një autokolonë u shënjestrua në mëngjesin e sotëm në Francën veriperëndimore.
Sipas mediave të huaja, qindra oficerë policie janë dislokuar në vendin e ngjarjes, ku një i dënuar që me nofkën “The Fly” ishte arratisur gjatë bastisjes.
Prita ndodhi në një autostradë në Incarville në Francën veriperëndimore rreth orës 9 të mëngjesit me orën lokale.
Eric Dupond-Moretti, Ministri i Drejtësisë i Francës, ka thënë se një nga oficerët e burgut që u vra la pas një grua që ishte shtatzënë në muajin e pestë, ndërsa tjetri ishte një 21-vjeçar, baba i dy fëmijëve.
Ai shtoi se dy nga të lënduarit janë në gjendje kritike për jetën.
Oficerët e burgut të vdekur dhe të plagosur po transportonin një të dënuar, të quajtur në mediat franceze si Mohamed Amra, kur u vunë nën sulm me armë zjarri, sipas raportimeve në vend.
Pamjet nga vendi i ngjarjes tregojnë dy burra me kapuç me armë që patrullojnë zonën pranë një kabine pagese në autostradën A154.
Disa burra kishin përdorur dy automjete për të shënjestruar kolonën, tha një burim policor për agjencinë franceze të lajmeve AFP.
Një nga veturat e përdorura në sulm është gjetur e djegur në një vend që nuk është specifikuar nga burimi policor.
LEXONI GJITHASHTU:
- Sulmohet furgoni i burgut në Francë: Vriten dy oficerë pranë Normandisë
- VIDEO| Pritë dhe vrasje policësh, kush është “bosi i drogës” që u arratis në Francë
