Sunak debat për Kosovën: I shqetësuar për situatën në Veri

Kryeministri i Mbretërisë së Bashkuar, Rishi Sunak është shprehur “i shqetësuar për situatën në Kosovë”, kur u pyet nga deputetja Alicia Kearns për një “dështim ndërkombëtar” në Ballkanin Perëndimor.

Kearns, kryetare e Komisionit për Politikë të Jashtme të Parlamentit Britanik e ka pyetur kryeministrin Sunak nëse do të ketë angazhim nga ai për zgjerim të mandatit të KFOR-it në Kosovë në mënyrë që misioni paqeruajtës i NATO-s të merret edhe me armët ilegale që tha se po futen nga Serbia në Kosovë.

Në përgjigje, kryeministri britanik tha se i dënon sulmet e paprovokuara ndaj pjesëtarëve të KFOR-it në veri, ndërsa tregoi se u kanë bërë thirrje kryeministrit të Kosovës, Albin Kurti dhe presidentit serb, Aleksandar Vuçiç që t’i ulin tensionet dhe ta parandalojnë dhunën.

“Ne jemi veçanërisht të shqetësuar, unë jam veçanërisht i shqetësuar për situatën në veri të Kosovës, të cilën ju e njihni dhe i dënojmë shumë sulmet e paprovokuara nga protestuesit ndaj personelit të KFOR-it. Sekretari i Jashtëm i ka thënë tashmë kryeministrit të Kosovës dhe Serbisë se liderët në Beograd dhe Prishtinë kanë përgjegjësi për ta ulur tensionin dhe për ta parandaluar dhunën e mëtejshme”, tha Sunak.

Deputetja Kearns në fund i bëri thirrje qeverisë britanike që ta ndjekë nga afër këtë situatë. Ajo mendon se Mbretëria e Bashkuar duhet t’i bashkohet BE-së dhe ta zgjasë mandatin e KFOR-it në Kosovë.

Për të ndjekur kanalin e youtube të Euronews Albania KLIKO KËTU!