Takimi me Macron në Pallatin Elize, Kurti zbulon detaje nga bisedimet

Kryeministri i Kosovës, Albin Kurti përmes një postimi në “Facebook” ka zbuluar detaje nga takimi i tij këtë të premte me presidentin francez, Emmanuel Macron në Paris.

Kurti thekson se pati një takim dy orësh me Macron ku diskutuan lidhur me rolin e NATO-s në Kosovë, angazhimin e misioneve të Bashkimit Evropian, si dhe për përkushtimin e vendit të tij për harmonizim të plotë me politikën e jashtme dhe të sigurisë së BE-së.

Ai thekson se gjatë takimit ngriti çështjet e sigurisë, forcimit të kapaciteteve mbrojtëse, dialogut me Serbinë dhe zbatimin e marrëveshjes për normalizim të plotë.

“Pata kënaqësinë sot të zhvilloj vizitë dhe të kem drekë pune në Pallatin Elize në Paris me Presidentin e Republikës së Francës, Emmanuel Macron.

Për rreth dy orë diskutuam për rolin e rëndësishëm dhe të vazhdueshëm të NATO-s në Kosovë, për angazhimin e misioneve të Bashkimit Evropian, si dhe për përkushtimin e Republikës së Kosovës për harmonizim të plotë me politikën e jashtme dhe të sigurisë së BE-së.

Nga Presidenti Macron kërkova mbështetjen e Francës në rrugën tonë drejt integrimit në BE e organizata ndërkombëtare dhe thellimin e bashkëpunimit ekonomik përmes organizimit të forumeve të reja të bizneseve Kosovë-Francë.

Gjithashtu, në takim ngrita çështjet e sigurisë, forcimit të kapaciteteve tona mbrojtëse, dialogut me Serbinë dhe zbatimin e marrëveshjes për normalizim të plotë.

Falenderoj Presidentin Macron për pritjen e përzemërt dhe mbështetjen e Republikës së Francës në ecjen e Republikës sonë përpara”, shkruan Kurti.