Talibanët shtojnë kufizimet ndaj grave dhe vajzave afgane

Kombet e Bashkuara kanë thënë se talibanët kanë rritur kufizimet ndaj grave dhe vajzave në Afganistan në muajt e fundit, përfshirë fushën e edukimit dhe punësimit.

Në raportin e saj më të ri, OKB-ja ka thënë se Ministria e talibanëve për Shëndetin Publik, ka bërë të ditur se vetëm burrat mund të hyjnë në provime për t’u regjistruar në studimet për mjekësi, shkruan REL. Në fillim të muajit maj, dy gra afgane – pjesëtare të një organizate ndërkombëtare joqeveritare – janë arrestuar nga forcat talibane në aeroport, sepse ato kanë udhëtuar pa u shoqëruar nga një burrë, apo nuk kanë qenë të mbuluara tërësisht.

Në qershor, një grua është kërcënuar me vdekje nga shërbimi i inteligjencës, nëse vazhdon të punojë me organizata ndërkombëtare.

Ajo është raportuar të ketë dhënë dorëheqje dy ditë më vonë.

OKB-ja ka thënë se ka regjistruar raste kur talibanët edhe kanë nisur t’i zbatojnë disa kufizime shtesë kundër lirisë së lëvizjes dhe punësimit të grave.

LEXONI GJITHASHTU:

• Talibanët ndalojnë organizatat suedeze në Afganistan pas djegies së Kuranit
• Talibanët urdhërojnë mbylljen e salloneve të bukurisë në Afganistan