“Të festojmë për unitetin dhe paqen”, politika uron “Ditën e Europës”

Në ditën ndërkombëtare të Europës, edhe politikanët shqiptarë kanë zgjedhur të ndajnë mesazhet e tyre.

Presidenti Bajram Begaj e ka përkujtuar këtë ditë përmes një postimi në Twitter, duke e cilësuar si një ditë të rëndësishme ku duhet të festohet për unitetin dhe paqen.

Kreu i shtetit shkruan se Shqipëria është pashmangshmërisht e lidhur me Bashkimin Europian dhe se rrugëtimi ynë drejt së ardhmes është objektivi për t’u bashkuar me vendet e unionit.

Ndërsa kryeministri Rama, i cili aktivitetin e ka përqendruar kryesisht në takime elektorale për zgjedhjet e 14 majit, si zakonisht zgjodhi të flasë më së shumti me imazh.

“Europa është këtu, këtu është Europë” shkruhet në foton e publikuar nga kreu i qeverisë, me mbishkrimin “Gëzuar Ditën e Europës” .

Edhe kryeparlamentarja Lindita Nikolla ka ndarë mesazhin e saj për 9 majin. Përmes një postimi në Twitter, Nikolla shkruan se familja e madhe europiane është kthyer në idealin demokratik për të cilin po punojnë shqiptarët.

“Europa dhe Shtetet e Bashkuara të Amerikës janë sinonimi i paqes, bashkimit, perëndimit, modernizimit, dhe mirëqenies,” – shkruhet ndër të tjera në postimin e kryetares së kuvendit.

LEXONI GJITHASHTU:

• Europa kundër kreut të shërbimit sekret serb: Rreziku që vjen nga Vulin
• Premier League angleze, barazim në derbin e Europës, një tjetër fitore për Newcastle