Mjekët sugjerojnë të merren masa kundër nënvarianteve të Omikronit

Në Shqipëri po qarkullojnë dy nënvariante të reja të Omikronit, njëri prej të cilëve pritet të bëhet dominant.

Situata nuk është e rënduar, pasi rastet nuk janë të shumta dhe sëmundshmëria është e lehtë, mirëpo ekspertët e fushës sugjerojnë të merren masa.

Epidemiologu Artan Simaku shpjegoi në emisionin Sot në Euronews Albania se nënvarianti i ri BA2 përbën aktualisht 8.3% të infektimeve në Shqipëri.

Ky nënvariant prej disa javësh qarkullon në shumë shtete të botës, e kryesisht në Europë.

Simaku sqaroi se personat e vaksinuar me 3 doza kundër COVID përjetojnë vetëm simptoma të lehta të këtij nënvarianti.

Aktualisht kemi një situatë të zbutur të COVID-19 në Shqipëri, sqaroi në Sot infeksionisti Gent Stroni.

Mirëpo ai thotë se nuk përjashtohet ndonjë “situatë të paparashikuar” rritjeje infektimesh apo simptoma më të rënda.

“Duhet të marrim masa dhe të jemi të përgatitur”, u shpreh Stroni.

LEXONI GJITHASHTU:

• Konfirmohet prezenca e 2 varianteve të Omicron në Shqipëri